Б.БИЛГҮҮН

УИХ дахь “Шударга ёс” эвслийн бүлгийг бүрдүүлдэг МАХН-ынхан “Засгийн газраас гарна” гэж албан бусаар УИХ-ын дарга З.Энхболдод хэлжээ. Одоогоор МАХН-аас Ч.Сайханбилэгийн Засгийн газарт З.Баянсэлэнгэ Барилга хот байгуулалтын сайдаар, Ц.Оюунбаатар Монгол Улсын Шадар сайдаар ажиллаж байгаа бөгөөд Эрүүл мэнд, спортын сайдын квот мөн тэдэнд оногдож байгаа юм. 

Харин МАХН-ынхан Ц.Оюунбаатарыг Эрүүл мэнд, спортын сайдаар, намынхаа дарга Н.Энхбаярыг Шадар сайдад томилуулах хүсэлтэй байгаа юм. Хэдийгээр УИХ-ын гишүүд Н.Энхбаярыг томилуулах асуудлаар тодорхой байр суурь илэрхийлэхгүй байгаа ч бүлгийн дарга нар хамтран ажиллах боломжтой гэж мэдэгдээд байна. Гэвч, тэрээр албан тушаалын байдлаа урвуулан ашигласан гэмт хэрэг үйлдэж байсан ялтайд тооцогдох тул АТГ-аас Н.Энхбаярыг өндөр дээд албан тушаалд тэнцэхгүй гэж тодорхойлсон юм.

Гэвч, МАХН-ынхан Н.Энхбаярыг Шадар сайдаар томилуулахгүй бол ээлжит бус чуулганд суухгүй, Засгийн газраас бүрэн бүрэлдэхүүнээрээ гарч, эвслээ задлах хүртэл арга хэмжээ авна гэдгээ УИХ-ын дарга З.Энхболдын өрөөнд орж хэлсэн байна. Хэрвээ, МАХН-ынхан эвслээс гарвал, Ч.Сайханбилэгийн Засгийн газар задрах аюулд унах юм.

Энэ зуур мөн угшил нэгт МАН, МАХН-ын Эх орончдын өдрийг хамтран тэмдэглэх талаар ярьж байгаа нь ирэх сонгуульд тэд эвсэх, нэгдэх замаар орж магадгүй гэх таамагт хүргэж байна. Үүнээс гадна, эрх баригчид ИЗНН болоод эвслийг бүрдүүлдэг МҮАН-тай нэгдэх асуудлыг хэлэлцэж байгаа. Хэрвээ, МАХН Засгийн газраас гарч, эвсэл задрах юм бол дараагийн Засгийн газрыг АН, ИЗНН болоод МҮАН-тай хамтран байгуулах боломжтой.