БНХАУ-ын Ардын дээд шүүх байгаль орчинд хохирол учруулсан компаниудын асуудлыг хэлэлцээд пүрэв гарагт анхны хэлэлцүүлгээр нь дэмжиж хохирлыг төлүүлэхээр торгууль ногдуулсан байна. Зяньсу мужийн Тайжоуд үйл ажиллагаа явуулдаг “Зиньхуэй” компани, өөр бас таван ч аж ахуйн нэгж нутгийн хоёр голд хүчил асгасны төлөө 160 сая юань буюу 26 сая долларын торгууль төлөх болж байна.

Ийм торгууль ногдуулж байсан түүх Хятад улсад урьд өмнө байгаагүй, тэгээд ч анхны хэлэлцүүлгээр ингэж шийдвэрлэж байгаагүй гэнэ.

Тайжоу хотын байгаль орчныг хамгаалах нийгэмлэг, ард иргэдээс гомдол гаргасны дагуу нутгийн ардын шүүх 2014 оны наймдугаар сард анх хэрэг үүсгэн  шалгаж эхэлсэн юм байна. Энэ зургаан компани хүчлийн агуулгатай 25 мянган шоо метр хаягдлаа гол руу асгаснаас байгаль орчин ихээхэн бохирдож асар их хэмжээний хохирол учирсан гэж байгаль хамгаалах нийгэмлэг үзэж баримтаар нотолжээ.

“Зиньхуэй” компанийн өмгөөлөгч Жао Бин шүүх хуралдаан дээр голыг бохирдлоос цэвэрлэх, хүрээлэн байгаа орчныг сэргээхэд ийм хэмжээний зардал гарахгүй хэмээн мэдэгдсэн ч Дээд шүүх энэ компани “аюултай хүчил ашиглах талаар гэрээгээр хүлээсэн үүргээ биелүүлээгүй учраас хариуцлага хүлээх ёстой “ хэмээн дээрх торгуулийг ногдуулсан байна.