Гацуурт ордын төрийн эзэмшлийн хувь тогтоох тухай тогтоолын төслийн эцсийн хэлэлцүүлгийг өчигдөр Эдийн засгийн байнгын хорооны хуралдаанаар хийлээ. Энэ үеэр төрийн эзэмшлийн хувь болоод түүнтэй дүйх хөрөнгө оруулалт, татварын талаар гишүүд асуулт асууж, үг хэлсэнгүй. Ингэснээр УИХ-ын нэгдсэн чуулганаар Засгийн газраас анх өргөн мэдүүлснээр тогтоолын төлсийг батлах нь зүйтэй гэж хэлэлцэх нь.  

Төр өөрийн хөрөнгөөр хайгуул хийж нөөцийг тогтоогоогүй ордоос дээд тал нь 34 хувийг эзэмшиж болдог. Энэ дагуу “Сентерра Гоулд Монголиа” компанийн эзэмшилд байдаг Гацуурт ордоос төрийн эзэмшлийн хувийг 34 байхаар заасан байгаа юм.

Харин өнөөдрийн байдлаар Гацууртын ордыг ашиглахтай холбогдуулан тусгай зөвшөөрөл эзэмшигч “Сентерра Гоулд Монголиа” компанитай төрийн эзэмшлийн хувь хэмжээг тогтоох, ашигт малтмалын нөөц ашигласны тусгай төлбөр авах талаар Ажлын хэсэг хэлэлцээ хийж хэд, хэдэн зүйлийг тохиролцсон.
Жишээ нь, алтны үнээс хамаарч ашигт малтмалын нөөц ашигласны тусгай төлбөрийн хувь өөрчлөгдөх саналыг эдийн засгийн тодорхой тооцоо, үндэслэлийн хүрээнд хөрөнгө оруулагч талд тавьж хэлэлцээ хийсэн бөгөөд талууд яриа хэлэлцээний үр дүнд тохиролцоонд хүрсэн юм. Тухайлбал, тусгай зөвшөөрөл эзэмшигч нь ашигт малтмалын нөөц ашигласны тусгай төлбөрийг 3 хувиар төлөх, хэрэв хуульд заасны дагуу ашигт малтмалын нөөц ашигласны тусгай төлбөр тооцох алтны үнэ нэг унц нь 1100 ам.доллараас доош орсон тохиолдолд тусгай зөвшөөрөл эзэмшигч нь ашигт малтмалын нөөц ашигласны тусгай төлбөрийн хэмжээг өөрчлөх тухай хүсэлтийг Засгийн газарт тавьж, үүний дагуу шинэчлэн тогтоож болох зэргээр тохиролцоонд хүрээд байгаа юм. Харин  хуульд заасны дагуу ашигт малтмалын нөөц ашигласны тусгай төлбөр тооцох алтны үнэ нэг унц нь 1400 ам.доллараас дээш болсон тохиолдолд Засгийн газар нь ашигт малтмалын нөөц ашигласны тусгай төлбөрийн хэмжээг өөрчлөх тухай хүсэлтийг тусгай зөвшөөрөл эзэмшигчид тавьж, үүний  дагуу шинэчлэн тогтоож болох аж.