Хятадын Шэньжэнь хотноо  БНХАУ-ын анхны удирдагч Мао Зэдуны төрсний 120 жилийн ойд зориулан нээсэн үзэсгэлэнд түүний цул алтан баримлыг тавьж нийтэд үзүүлсэн байна. 16 сая долларын өртгөөр бүтсэн эл баримал 80  см өндөр, 50 кг жинтэй юм байна.
Их удирдагчаа зөөлөн сандал дээр сууж байгаагаар дүрсэлсэн энэ баримлыг цул алтаар бүтээж эрдэнийн чулуугаар чимэглэсэн бол сандлыг нь хас чулуугаар урлажээ.
20 уран барималч  нийтдээ 8 сарын турш урласан энэ үнэт бүтээлийг ямар компани, хэн ивээн тэтгэснийг мэдээлэлд дурдаагүй байна. Үзэсгэлэн буусны дараа энэ баримлыг Мао Зэдуны төрсөн Хунань муж дахь Шаошань сууринд байдаг түүний гэр музейд шилжүүлж өгчээ.
1949 онд БНХАУ байгуулагдсанаас эхлээд  1976 онд нас барах хүртлээ удирдсан Мао Зэдуны мэндэлсний 120 жилийн ойг 2013 оны  арванхоёрдугаар сарын 26-нд тэмдэглэсэн юм.