Лондон дахь Батлан хамгаалал судлалын хүрээлэнгийн үнэлгээгээр Орос улс Сири дэх байлдааны ажиллагаанд өнгөрсөн арваннэгдүгээр сар хүртэлх хугацаанд нийтдээ 4,0 тэрбум ам.доллар зарцуулсан байна гэж дүгнэсэн байна. Харин Оросын засгийн газрын эх сурвалж ОХУ ирэх 2016 онд энэ ажиллагаанд 1,2 тэрбум доллар зарцуулахаар төлөвлөсөн гэснийг Bloomberg мэдээлжээ.
Агентлагийн мэдээллээр бол ОХУ Сири дэх байлдааны ажиллагаанд өдөр тутам 3,3 сая доллар зарцуулж байгаа юм байна.
Лондонгийн хатан хааны судалгааны төв Оросуудыг сирийн кампанид өдөрт 4,0 сая доллар зарцуулж байгаа гээд Су-24 бөмбөгдөгч онгоц нь сүйрсний дараанаас хоногийн зардал нь 8,0 сая доллар болсон гэсэн байна.
Сирид байлдаж байгаа 34 онгоцоо 37 болгож нэмнэ гэж ОХУ-ын БХЯ-ны Жанжин штабын дарга Валерий Герасимов арваннэгдүгээр сарын дундуур мэдэгдсэн. Мөн Газрын дундад тэнгист байгаа 6 хөлөг онгоцоо ч 10 хүртэл нэмэх юм байна.
Британийн судалгааны төвийн үнэлснээр бол Сирид байгаа цэргийн албан хаагчдын тоо сар хагасын өмнө 1600 байсан бол одоо 5000 хүртэл өсөөд байгаа юм.
ОХУ-ын Засгийн газрын тэргүүн Дмитрий Медведев энэ долоо хоногт сэтгүүлчидтэй уулзахдаа Сирий дэх байлдааны ажиллагаанд зарцуулж байгаа хөрөнгө нь цэргийн төсөвт багтсан гээд үүн дээр нэмэх талаар БХЯ-наас хүсэлт ирээгүй гэсэн юм. Тэрээр тодорхой тоо хэлэлгүй “энэ бол нууц” гээд өнгөрөөсөн байна.