Умард Солонгосын удирдагч Ким Чен Ун саяхан Германы Mercedes компаниас ээлжит машин худалдан авсан байна. Хуягласан энэ машин миномётын сумыг ч тэсвэрлэх чадвартай гэнэ. Ким Чен Ун өөрийнхөө амь насанд халдаж магадгүй гэж үзээд ийм машин авч байна гэж шинжээчид  тайлбарлаж байгаа юм. Машины үнэ нь 1,5 сая доллараар үнэлэгдэж байна.
Уг нь Умардын удирдагчийн авто паркад Mercedes маркийн хуягласан хоёр ч машин бий.

БНАСАУ-ын үе үеийн удирдагчид үргэлж гадаадын машин унадаг түүхтэй. Анхны ерөнхийлөгч Ким Ир Сен авто парктаа гадаадын брэндийн өндөр зэрэглэлийн хэдэн зуун машинтай байсан бол түүний хүү Ким Чен Ир улс орон нь гадаадын хүмүүнлэгийн тусламжаар амьдарч байхад тэр мөнгөөр Mercedes-Benz S-Class маркийн хоёр зуун машин захиалж дуулиман тарьж байсан түүхтэй.
Ким Чен Ирийн төрсөн хүү, БНАСАУ-ын өнөөгийн удирдагч Ким Чен Ун ч тэднээс хоцорсонгүй. Түүний тансаг хэрэглээний захилга нэг жилд л гэхэд долоон хувиар өссөн дүн гарч байна. Үүний ихэнх нь автомашин, үлдэх хэсэг нь компьютер, архи.

Гэтэл НҮБ-ын энэ зуны мэдээгээр тус оронд хүнс тэжээлийн дутагдалтай хүүхдийн тоо нийт хүүхдийн 38 хувьд хүрээд байгаа юм.