ОХУ-ын нийслэл Москва орчмын Подольск клубт цагдаагийнхан тусгай ажиллагаа явуулж эрүүгийн гэмт хэргийн бүлэглэлийн томоохон төлөөлөл 50 этгээдийг цуглараад байхад нь саатуулан баривчилсан байна.

Тэднийг ээлжит уулзалтаа хийж байхад нь цагдаагийнхан дайрч орсон байна. Зарим эх сурвалжийн мэдээлж байгаагаар бол тэдний уулзалтын гол зорилго нь BMW X6 автомашин байжээ. Цугларагсдын нэг этгээд подольскийн бүлгийн хэн нэгэнд ийм машиныг 3,5 сая рублиэр зарсан бололтой. Худалдан авсан хүн тооцоогоо хийсэн ч машинаа авч амжаагүй байхад нь  хулгайлчихсан гэнэ. Худалдан авагч мэдээж гомдоллож гэмт бүлэглэлийнхэн асуудлыг хэрхэн шийдвэрлэхээ ярилцахаар цугларсан бололтой.

Гэмт бүлэглэлийг саатуулах үеэр цагдаагийнхан байлдааны зургаан гар буу, бие хамгаалах буунууд,  калашниковын дөрвөн автомат буу, их хэмжээний сум хэрэгсэл  хураажээ. Саатуулагдсан хүмүүс өөрсдийгөө  ямар ч цугларалт, хуйвалдаан байхгүй зүгээр л зочноор ирсэн гэж мэдүүлж байгаа гэнэ. Хууль сахиулагчид юутай ч зэвсэг хадгалсных нь төлөө хэрэг үүсгэн шалгаж эхэлсэн байна.