Э.ГАНЦЭЦЭГ

Австрийн Вена хотноо үргэлжилж буй “Эх дэлхийн мисс-2015” тэмцээнд эх орноо төлөөлж буй мисс А.Баярцэцэг “Шилдэг коктейль даашинз”-ны төрөлд дизайнер Д.Отгонжаргалын урласан гоёлын даашинзаар гангарч, гуравдугаар байр эзэлсэн тухай бид өмнө нь мэдээлсэн. Гоёлын даашинзны загвар зохион бүтээгч гэдгээр нь хувцас загварынхан, тэр дундаа даашинзны хорхойтнууд андахгүй мэдэх дизайнер Д.Отгонжаргалын хувьд дэлхийн олон орны тайзнаа коллекцоо толилуулж, олны нүдийг хужирласаар ирсэн нэгэн.

Энэ оны тавдугаар сард Азийн шилдэг дизайнерууд хуран чуулсан “Asian fashion festival”-д оролцож гран при шагнал хүртсэн тэрээр Хонконгийн тэрбумтан бүсгүйд нэг тэрбум төгрөгөөр үнэлэгдэх цор ганц гоёлын даашинз урлаж байгаа аж. Өнгөрсөн жил тэрээр дан гоёлын даашинзны коллекцоос бүрдсэн “O’couture” загварын шоугаа толилуулсныг хувцас загварынхан өндрөөр үнэлсэн юм. Тиймдээ ч “O’couture” шоугаа цаашид уламжлал болгон зохион байгуулахаар болсон гэнэ. Энэ жилийн шоу нөгөөдөр болно. Г.Уранцэцэг тэргүүтэй Монголын топ загвар өмсөгчид шоунд оролцож, Д.Отгонжаргалын бүтээлүүдийг амилуулах аж. Түүний гоёлын даашинзууд шинэ жилийн үдшийн хатан хаадын сонголт байх нь лавтай.