Хятадын эрх баригчид авлигатай тэмцэх ажлынхаа хүрээнд төрийн албан хаагчдыг ёсзүйтэй байлгах үүднээс шинэ журам гаргасан байна. Энд “Намын гишүүд олон нийтийн болон хувийн эрх ашгаа ялгаж, нийгмийн сайн сайхны төлөө шударгаар цуцалтгүй хөдөлмөрлөх ёстой” гэж заан ХКН-ын 88 сая гишүүнд тараасан гэж мэдээлжээ.
Намын гишүүд ёс суртхуунтай байх ёстой гээд тансаг хоол зооглох, гольф тоглох, гэр бүлээс гадуур бэлгийн харилцаа тогтоох, нууц амрагтай болж гэр бүлээ мэхлэхийг хоригложээ.
Үүний зэрэгцээ албаны зүйлсийг хувийн зорилгоор ашиглах, нууц задлах, хувийн ажлаа албаны байдлаа ашиглан бүтээх зэргийг хатуу хориглосон байна.
Си Зинпинь 2013 оны гуравдугаар сард БНХАУ-ын даргаар сонгогдсоныхоо дараанаас авлига хээл хахуультай тэмцэж ийм зөрчил гаргасан л бол төрийн албаны хамгийн бага тушаалаас эхлээд өндөр албаныханыг ч хайр найргүй цээрлүүлж байгаа юм. Энэ ажлынхаа хүрээнд тэрээр төрийн албан тушаалтнуудын тансаглалыг болиулахаар шийдвэрлэж авсан олон арга хэмжээний нэг нь 2014 оноос гольфийн шинэ талбай байгуулахыг хориглосон юм.