“Хувьсал” продакшн “Зэрлэг цэцэгсийн хүлэмж”, “Зүрхээр наадагч”, “Тооцоогүй тоглоом” гэх уран бүтээлүүдээ үзэгчдэд хүргээд багагүй магтаал, сайшаал урамшуулал, тэр ч байтугай шилдгийг шалгаруулах наадмаас нь хүртэл шагнал авсан билээ. Энэ хугацаанд тэд зүгээр суулгүй, яавал Монголынхоо кино урлагийг дэлхийн төвшинд хүргэх вэ гээд багагүй судалгаа хийжээ. Үр дүнд нь Монголын зохиолч, найруулагч, зураглаач, жүжигчдэд дэлхийтэй өрсөлдөхүйц ур чадвар нь бүрэн дүүрэн байна гэдэг нэг л зүйлийг ойлгосон гэнэ. Монголын уран бүтээлчид хийсэн бүтээл яагаад Оскарт, Канийн наадамд нэр дэвшиж болохгүй гэж үзээд хамтдаа хүчээ үзэхээр шийдэж техникийн үзүүлэлт, уран бүтээлчдийн ур чадвараараа дэлхийн стандартыг хангасан бүтээл хийе хэмээн зорьж ажиллаж эхэлсэн байна.

Тэдний ээлжит дэлгэцийн бүтээл болох 2016 онд нээлтээ хийх “Атганд үлдсэн эрдэнэ” хэмээх бүтээлээ техник үзүүлэлтийн хувьд дэлхийн кино урлагийн стандартад нийцүүлэхээр зорьж, АНУ-д өнгө шүүлт, болон дуу, чимэглэлийн ажлаа эхлүүлсэн аж.