Монголын морин хуурын дөрвөлийг Европ тивд анх удаа эгшиглүүлж байсан Үндэсний дуу бүжгийн эрдмийн чуулгын ерөнхий удирдаач, Монголын урлагийн ажилтны холбооны хөгжмийн нийгэмлэгийн тэргүүн Н.Буянбаатар их урлагийн тайзнаа 30 жил ажиллаж, хөдөлмөрлөсний тайлангаа тавихаар болжээ. Түүнийг 2006 онд Их Монгол Улс байгуулагдсаны 800 жилийн ойн концертын удирдаачаар, 2008 онд Их Монгол Улс байгуулагдсаны 802 жил, Ардын хувьсгалын 87 жилийн ой зэрэг Төрийн хүндэтгэлийн концертуудад удирдаачаар 20 гаруй жил амжилттай ажилласан гэдгээр нь хүмүүс илүүтэй танина. 2006 оноос хойш өдий хүртэл ҮДБЭЧ-ын ерөнхий удирдаач, Монгол Төрийн Үндэсний Хөгжмийн их найрлын ерөнхий удирдаачаар ажиллаж буй түүний уран бүтээлийн тайлан тоглолт энэ сарын 21-нд болох бөгөөд үндэсний, рок попын, сонгодог урлагийн мастерууд бүрэн бүрэлдэхүүнээрээ оролцож олон гэнэтийн бэлэг бэлтгэснээ дуулгалаа.