“РИО-2016” олимпийн наадамд оролцох Монгол Улсын баг тамирчдаа дэмжих уриатайгаар зохион байгуулагдаж буй хэвлэл, мэдээллийн салбарын “Спортын их наадам-2015” цуврал тэмцээн сагсан бөмбөгийн өрсөлдөөнөөр эхэллээ. Энэ удаагийн тэмцээн Хандгайт дахь Д.Содномзундуйн нэрэмжит Монголын Үндэсний сагсан бөмбөгийн ордонд өнгөрөгч амралтын өдрүүдэд боллоо. Тэмцээнийг Монголын сэтгүүлчдийн нэгдсэн эвлэл(МСНЭ), Монголын спортын сэтгүүлчдийн холбоо(МССХ), “Сэтгүүлч форум” ТББ хамтран тэмцээний ерөнхий зохион байгуулагчаар, Монголын үндэсний сагсан бөмбөгийн ордон зохион байгуулагчаар, Монголын үндэсний спортын цогцолбор, “Нирун” мэдээллийн сайт дэмжигч байгууллагаар тус тус ажилласан юм.

Монголын сэтгүүлчдийн нэгдсэн эвлэлээс санаачлан зохион байгуулсан тэмцээнд нийт 20 гаруй баг хурд хүч самбаагаа сорьж хэвлийнхэн маань мэргэжлийн тамирчдаас дутахгүй эн тэнцүү өрсөлдсөн юм. Тэмцээний эрэгтэй багийн алтан медалийн эзнээр ETV-гийн бага тамирчид тодорсон бол мөнгөн медалийн “Ардчилал” сонины баг, хүрэл медалийг SPS телевизийнхэн хүртлээ. Эмэгтэй аварга багаар NTV-гийн хурд хүчтэй охид тодорлоо. Мөнгөн медалийг “Монгол ньюс”, хүрэл медалийг Дархан-Уул аймгийн хэвлэл мэдээллийнхний нэгдсэн охидын баг хүртэж энэ жилийн аваргууд тодорлоо. Энэхүү тэмцээнийг жил бүр уламжлал болгон зохиохоор тогтсон байна.