Оросын иргэний агаарын тээврийн А-321 онгоц Синайн хойгт осолдсоны дараа ОХУ, Их Британи улсууд энэ орон руу нислэг үйлдэхээ зогсоосноос Египетэд  зорчдог жуулчдын тоо 70 хувь буурна гэж үзэж байна. Орос тус улс руу нислэг үйлдэхээ зогсоосон нь Египетийн аялал жуулчлалын салбарт том цохилт боллоо хэмээн тус улсын Аялал жуулчлалын сайдын зөвлөлийн гишүүн  Мухаммед Юсеф хэлжээ. Тэрээр Орос бол Египет рүү ирдэг жуулчдын тоогоор нэгдүгээрт ордог, зөвхөн өнгөрсөн онд оросоос гурван сая, Их Британиас нэг сая жуулчин ирсэн гэж тэмдэглэсэн байна.
Ингэхээр энэ хоёр орны жуулчид л ирэхгүй бол нийт жуулчдын 70 хувь нь байхгүй болно гэжээ.
Оросын хувьд ч Египет рүү зорчигчдын тоо буурвал аялал жуулчлалын салбарт цохилт болох учраас аялал жуулчлалын компаниуд одоо Туркийг сонгон сурталчилж эхэлсэн байна.
Аравдугаар сарын 31-нд болсон онгоцны ослын дараа Египетийн Шарм-эль-Шейх амралтын газар луу нисдэг нислэгээ үүний өмнө Их Британи, Франц, Нидерланд, Герман, Латви, Литва улсууд зогсоогоод байгаа юм.