Гоо сайхны мэс заслын нэгэн шинэ хэлбэр сахал шилжүүлэн суулгах ажилбар жилээс жилд нэмэгдэж байгаа гэнэ. Нью-Йоркийн нэгэн эмчийн баталснаар өмнө нь тун ховор байсан энэ эмчилгээ өнөөдөр тун элбэг болж долоо хоногт гурван ч хүн ийм хүсэлт гаргадаг болсон гэжээ.
Олон улсын үс  ургуулах мэс заслын арилжааны бус байгууллагын мэдээгээр 2012 он гэхэд үс ургуулах мэс заслын 1,5 хувийг сахал шилжүүлэн суулгах мэс ажилбар эзэлж байсан бол энэ үзүүлэлт 2014 онд 3,7 хувь болж өсчээ. Энэ үйлчилгээнд зуучилдаг Medigo  компанийн мэдээгээр дэлхий дахинаа ийм мэс засал 2004 онтой харьцуулахад бүр 600 хувиар өссөн гэнэ.
“New York Times” сонинд өгсөн ярилцлагадаа мэс засалч Жеффри Эпштейн  хэдэн жилийн өмнө жилд тав зургаахан ийм мэс засал хийдэг байсан бол өнөөдөр долоо хоногт гурван удаа ийм ажилбар хийдэг гэжээ. “Ийм мэс засал Бруклинд бүр их дэлгэрсэн. Олон хүн царай төрхөө өөрчилж сахал тавих болсон. Ингэснээрээ тэд илүү эрэгтэйлэг харагддаг” гэж тэр хэлж байна.
Үйлчлүүлэгч бүрт өөр өөрийн гэсэн шалтгаан байдаг. “Би яг л хүүхэд шиг царай төрхтэй болохоор хүмүүс надад нэг л итгэлгүй ханддаг. Уг нь би 28 настай ч өвчтөнүүд маань намайг хараад бараг л ийм хүүхдэд өөрийгөө даатгах уу гэж боддог байх” гэж эмч Хосе Армос хэлсэн бол Рэй гэгч “Сахалтай болохын тулд гурван ч удаа мэс засал хийлгэж 22 мянган доллар зарцуулсан. Миний насан дээр олон хүн машин, байшин авах гэж их хэмжээний мөнгө зарцуулдаг байх. Харин надад бол сахал л хэрэгтэй” гэж ярьжээ.