Улсын дуурь бүжгийн эрдмийн театр П.И.Чайковскийн “Хунт нуур” бүжгэн жүжгээр 53 дахь улирлын нээлтээ хийсэн. Тайзнаа хоёр өдөр тоглогдсон уг жүжгийг Монгол Улсын Их хурлын дарга З.Энхболд тэргүүтэй улс төр, урлаг соёлын алдартнууд үзэж сонирхсон бөгөөд танхим дүүрэн үзэгчтэй байлаа.

Тоглолтын симфони найрал хөгжмийн ерөнхий удирдаачаар Гавьяат жүжигчин Ж.Бүрэнбэх ажиллаж, гол дүрийг Гавьяат жүжигчин Ч.Ганчимэг, Соёлын тэргүүний ажилтан Б.Саруул бүтээсэн бол Зигфридийн дүрд Соёлын тэргүүний ажилтан М.Од, Ротбартад Соёлын тэргүүний ажилтан А.Өлзий-Орших, Э.Эрдэнэжаргал нар тогложээ. УДБЭТ-ын хамт олон дараагийн уран бүтээлдээ орсон бөгөөд Г.Доницеттийн “Лучиа Ди Ламмермур” дуурийг тайзнаа амьдруулахаар ажиллаж байгаа аж.