Энэтхэг улсад зам засварын ажил хийж байсан нэгэн ажилтан нүхэнд унасны дараа түүнийг засварын ажилчид амьдаар нь булж, замыг хайргаар битүүлсэн осол гарсан байна. Нутгийн ажилчин залуу Латори Барман гэдэг нэртэй хүн амиа алдсан болохыг Нью Дели хотын цагдаа нар хэвлэлийнхэнд мэдэгдэж, дээрх хэрэг санамсаргүй байдлаас үүдэлтэй “осол” гэж тодорхойлжээ. Амиа алдсан золгүй залуу өнгөрсөн баасан гарагт согтуу байсан бөгөөд хяналтын бичлэгээр түүнийг нүхэнд унаж, амьдаараа хайрганд булуулсан болохыг илрүүлсэн байна. Нүхэнд унасан эр гарах гэж оролдсон боловч хэтэрхий согтуу байсан бололтой. Одоогийн байдлаар барилгын ажилчид болон зам засварын ажилчид баривчлагдаад байгаа бөгөөд хэрэг эцсийн шатандаа шийдэгдэж хариу гартал тэднийг сэжигтнээр байлгах юм байна. Засварын ажил гүйцэтгэж байсан компани амиа алдсан залуугийн ар гэрийнхэнд нөхөн олговор болгож 50 мянган рупи буюу 760 ам.доллар өгсөн байна. Энэтхэг улсад ослоор амиа алдсан тохиолдолд иймэрхүү хэмжээний нөхөн олговор авдаг талаар АНУ-ын хэвлэлүүд мэдээллээ.