Монголын Урлагийн Зөвлөлөөс санаачлан АНУ-ын Элчин сайдын яамтай хамтран Америкийн “Нортвест данс прожект” компанийн аялан тоглолтыг энэ сарын 21-26 нд зохион байгуулах гэж байна. Америкийн орчин үеийн бүжгийн хөгжлийг тодорхойлогч, дэлхийн шилдэг бүжиг дэглээчид, шилдэг бүжигчдийг нэгтгэн 175 цоо шинэ бүтээлийг толилуулсан тус компани 12 хүний бүрэлдэхүүнтэйгээр манай улсад анх удаа өөрсдийн шилдэг бүтээлээс танилцуулахаар болсон нь энэ.
Тус аялан тоглолтын хүрээнд “Орчин үеийн бүжгийн үдэш” тоглолтыг Дуурь, бүжгийн эрдмийн театрт энэ сарын 25-нд тоглох юм байна. Мөн УДБЭТ, мэргэжлийн дуу бүжгийн чуулгын 100 гаруй залуу бүжигчинд мэргэжлийн сургалтыг удирдан явуулах бөгөөд тус компанийн гэрлийн дизайнер, тайзны менежер хамтран мэргэжлийн тайз гэрлийн сургалтыг 50 гаруй мэргэжлийн гэрлийн инженерт зохион байгуулахаар болжээ.