Тайванд өнгөрсөн бямба гаригт Соуделлор нэртэй хар шуурга дайран өнгөрч зургаан хүн нас барж, дөрвөн хүн ор сураггүй алга болоод байна. Мөн зуу гаруй хүн хүнд хөнгөн шархдаж эмнэлэгт хүргэгджээ. Хүчтэй салхины улмаас модод үндсээрээ булгарч, сурталчилгааны самбарууд унаж, галт тэрэгний хэд хэдэн шугамыг хаасан байна.  Хамгийн аймшигтай нь хүчтэй шуурга хэдэн сая хүнийг гэрэл цахилгаангүй болгосон байна.  Тайванийн эрчим хүчний “Taipower”  компанийн мэдээлснээр 3,2 сая өрхийн гэрэл цахилгаан тасраад байгаа гэнэ. Энэ нь арлын түүхэн дэх хамгийн хор хөнөөлтэй шуурга болоод буй аж.  Жанхуа, Таоюань, Синьбэй зэрэг олон хотод цахилгааны шугамууд унаж, их хэмжээний гэмтэл учирсан учраас ийн нийтээрээ цахилгааны хомсдолд ороход хүрсэн байна. Шинжээчдийн үзсэнээс хуй салхи арлыг баруунаас зүүн тийш нь бүхэлд нь гаталсан аж. Одоогийн байдлаар хуй салхи Хятадын эх газар руу 150 мянган хүн амтай хоолойн зүг хөдөлсөн  гэж үзэж буй. Шуурганы төвд хурд нь 58-48 хүртэл метр секунд байсан гэж тооцсон аж. Хэдийгээр Тайванийн зарим хотууд өртөөгүй ч сургууль, албан байгууллагууд энэ өдөр хаалгаа барьжээ.  Хэдэн зуун нислэг хойшлогдож, галт тэрэгний маршрутад ч өөрчлөлт оржээ. 2009 оны наймдугаар сард Моракот нэртэй хүчтэй шуурганы улмаас  тус улсад 650 хүн амь үрэгдэж байсан мэдээ бий.