Ойрхи Дорнодын амьсгалын замын хам шинж буюу “MERS” титэмт вирусийн тархалттай тэмцэх арга хэмжээгээ Өмнөд Солонгос улам чангатгах хэрэгтэй байгааг ДЭМБ-ын шинжээчдийн баг цохон тэмдэглэлээ.

ДЭМБ-ын дэд захирал Кэйжи Фүкүда тэргүүтэй төлөөлөгчдийн баг Өмнөд Солонгосын ЭМЯ-ны албаны хүмүүстэй хамтран “MERS”-ийн тархалтыг судалсан юм.

Өнөөдрийн байдлаар, тус улсад уг вирусийн халдвар авсан нь тогтоогдсон хүмүүсийн тоо 138 болсны 14 нь нас барсан байна.
К.Фүкүда өнөөдөр Өмнөд Солонгосын албаны хүмүүстэй хамтарсан хэвлэлийн бага хурал хийх үеэрээ, “Уг вирус өргөн цар хүрээг хамран тархаагүй. Халдвар авсан бүх тохиолдол эмнэлгээр дамжсан” гэлээ.

Гэхдээ тэрбээр цаашид халдвар авсан олон тохиолдол нэмж бүртгэгдэж болзошгүй гэж анхааруулаад, вирусийн тархалтыг зогсоохын тулд нөхцөлд байдалд илүү нухацтай хяналт тавьж, ажиглахыг Өмнөд Солонгосын Засгийн газарт уриаллаа.

“MERS” ямар замаар, хэрхэн халдварлаж байгааг тогтоохын тулд ДЭМБ-ын шинжээчид эмнэлгүүдэд очсон юм.

Энэ вирус Өмнөд Солонгост богино хугацаанд харьцангуй хурдан тархлаа гэж шинжээчид хэлэв.