АНУ-ын Хуульзүйн яаманд Олон Улсын хөлбөмбөгийн холбооны түшмэлүүдийг авлига авсан хэрэгт буруутган шалгаж, шүүхэд сонссон материалуудыг нийтэд дэлгэж эхэллээ. Энэ үеэр Умард болон Төв америк, Карибын тэнгисийн орнуудын хөлбөмбөгийн нийгэмлэгүүдийн холбооны ерөнхий нарийн бичгийн дарга, ФИФА-гийн гүйцэтгэх хорооны гишүүн байсан Чак Блейзер мэдүүлэг өгч эхэлсэн байна. Тэрээр Холбооны мөрдөх товчооны мэдээлэгч, АНУ-ын хууль сахиулах байгууллагатай хамтран ажиллаж Олон улсын хөлбөмбөгийн холбоонд нүүрлээд байсан гэмт хэргийн тухай илчлэхийг бодсон бололтой.

Тэр өөрөө болон ФИФА-гийн албан тушаалтнууд авлига авч байж 2010 оны дэлхийн аварга шалгаруулах тэмцээн зохион байгуулах эрхийг Өмнөд Африкийн бүгд найрамдах улсад өгсөн гэж Чак Блейзер мэдүүлжээ.

“Үндсэндээ 1993 оноос эхлээд 2000-аад оны дунд үе хүртэл би болон бусад албан тушаалтан авлига авч байж дэлхийн аварга шалгаруулах болон “Алтан цом”-ын тэмцээнийг шууд дамжуулах эрхийг телевизүүдэд олгодог байсан. Энэ бол 1996, 1998, 2000, 2002 болон  2003 он. 2004-2011 онд би, гүйцэтгэх хорооны бусад гишүүд авлига авсны хүчинд Өмнөд Африкийн бүгд найрамдах улсыг дэлхийн аварга шалгаруулах тэмцээн зохион байгуулах орноор сонгосон” гэж Блейзер хэлснийг Guardian дамжуулжээ. Авлигын мөнгөө тэд АНУ-д чекээр авч байсан гэнэ.
Блейзер мөдөн байцагчидтай хамтран ажиллахыг зөвшөөрч, мэдүүлгээ дуу бичлэгийн хураагуурт өгч байгаа юм байна.