Америкийн тусгай албаны нэг ажиллагааны үеэр “Лалын улс” зэвсэгт бүлэглэлийн 32 дайчныг устгасан байна. Сири дэх хүний эрхийн талаарх ажиглалтын комисс “Ажиллагааны үеэр Лалын улс бүлэглэлийн 32 хүнийг устгасны дотор эдний нефтийн том түнш Абу-Ас-Сайяф, “Лалын улс”-ын Батлан хамгаалахын сайдын орлогч, харилцаа холбооны асуудал хариуцсан дарга зэрэг нөлөө бүхий дөрвөн ч хүн үрэгджээ” гэж мэдээллээ. Энэ ажиллагааг Иракт байгаа америкийн тусгай алба гүйцэтгэсэн байна. Мөн “лалын улс”-ын удирдагчдын нэг Абу Сайяфаг устгаж, эхнэрийг нь саатуулсан гэж Цагаан ордны Үндэсний аюулгүй байдлын зөвлөлийн төлөөлөгч Бернадетт Михэн хэлсэн байна.
Ирак, Сирийн нутагт ажиллаж, засгийн газрын эсрэг тэмцэж байгаа эгнээндээ 30 орчим мянган дайчидтай “Лалын улс” зэвсэгт бүлэглэл нь эзэлсэн газар нутагтаа халифат зарлаад түүнийгээ улам тэлэхийн төлөө байлдсаар байгаа юм.