Манай улсын  залуу уулчин Д.Отгонхүү Европ тивийн ноён оргил Эльбруст хоёр дахь удаагаа амжилттай авирч гарлаа. Оргилд гарсныхаа дараа тэр Аугаа их Эх орны дайны ялалтын баярын 70 жилийн ойд зориулан зохион байгуулсан  "Европ тивд үүнээс дээш гүйх газаргүй" уриатай “Redfox Elbrus race” нэртэй уулын гүйлтийн Олон улсын А зэрэглэлийн тэмцээнд оролцсон байна.
Ингэхдээ skyrunning буюу уулын гүйлтийн уралдааны босоо нэг км-ийн ангиллаар 18 орны 311 тамирчин оролцсоноос 35-р байрт орж Монгол улсынхаа рекордыг эвдэн, 58.52 минутаар шинэчлэн тогтоосон байна. Нэг км босоо ангилал гэдэг нь далайн  түвшнөөс дээш 1000 метрт буюу нэг км өндөрлөгт таван км зам туулдаг юм байна.   Д.Отгонхүү нь энэ ангилалдаа Монголын рекордыг анх хоёр жилийн өмнө 2013 оны тавдугаар сарын 6-ны өдөр 1:01:54 цагаар тогтоож байжээ.