Ц.ХАС

Монголчууд Сэлэнгэ мөрөн дээр “Шүрэн”-гийн усан цахилгаан станц барих нь Байгаль нуурын эко системд муугаар нөлөөлнө гэж ОХУ-ын Байгалийн нөөц, экологийн сайд Сергей Донской мэдэгдлээ. Тэрээр энэ тухай мэдэгдлээ. Монгол-Оросын хамтарсан зөвлөгөөний өмнө болсон хуралдааны үеэр хэлсэн байна. Түүнчлэн “Шүрэн”-гийн усан цахилгаан станц барих төслийг зогсоохыг хүсч ОХУ-ын тал Монгол Улсын Шадар сайдад асуудал тавьж, Гадаад харилцааны сайдад захидал илгээснээс гадна Орос-Монголын Засгийн газар хоорондын Худалдаа эдийн засаг, шинжлэх ухаан техникийн хамтын ажиллагааны комиссын 18 дугаар хуралдаанд хүртэл оруулан хэлэлцүүлж байсан юм гэж тус улсын http://забрабочий.рф сайтаар мэдээллээ.

Байгаль нуурт 491 гол, горхи цутгадаг ч нийт усны сэлбэлтийн 50 хувийг Сэлэнгэ мөрөн хангадаг учраас ОХУ-ын тал Сэлэнгэ аймгийн Цагааннуур сумын нутагт “Шүрэн”-гийн усан цахилгаан станц баригдвал экологийн асах их хөнөөлтэй гэж байгаа юм. Гэсэн ч манай улс “Шүрэн”-гийн цахилгаан станцыг 780 орчим мянган ам.долларын хөрөнгө оруулалтаар барьж чадвал, 244 мВт-ын эрчим хүч гаргаж авах боломжтой болох юм. Энэ оны эхний байдлаар дээрх станцын судалгааны ажилд 350 орчим мянган ам.доллар зарцуулсан бөгөөд инженер, техникийн судалгаа болон байгаль орчинд нөлөөлөх байдлын нарийвчилсан үнэлгээг эцэслэн боловсруулах хүртэл гурван сая ам.доллар зарцуулна гэж тооцоод байна.