Инфляци өнгөрсөн хоёрдугаар сард өмнөх сараас 0.4 хувиар өссөн үзүүлэлттэй гарлаа. Харин  өмнөх оны жилийн эцсээс 1.1 хувиар, өмнөх оны мөн үеэс  9.3 хувиар өслөө хэмээн Үндэсний Статистикийн хорооноос мэдээллээ.

Тодруулбал хоёрдугаар сард өмнөх сараас 0.4 хувиар өсөхөд хүнсний бараа, ундаа, усны бүлгийн үнэ дүнгээрээ 0.9 хувь, хувцас, бөс бараа, гутлын бүлгийнх 0.4 хувиар  өссөн нь голлон нөлөөлснийг тодотгов. Өмнөх жилүүдэд инфляци өсөхөд мах, сүүний үнийн нэмэгдэл нөлөөлж байсан бол энэ жил нөлөөлөл багатай байгааг мэргэжилтнүүд хэлж байна. Махны үнэ тогтвортой байгаагаас гадна сүү, сүүн бүтээгдэхүүний үнэ буурсан нь инфляцид нөлөөлөх  нөлөө нь багасчээ. Инфляцийг тооцохдоо гол нэрийн 329 бараа бүтээгдэхүүний үнэд суурилан тооцсон байна. Тэгвэл үүний 36 хувь нь импортоор орж ирсэн бүтээгдэхүүн аж.