Эверестэд авирах гэсэн 300 гаруй уулчин дэлхийн хамгийн өндөр оргилд гарч болох эсэхээ мэдэх гэж Балбын Засгийн газрын зөвшөөрлийг хүлээж ядаж байна. Уулчдын улирал эхлэхэд хэдхэн долоо хоног үлдээд байхад Балбын эрх баригчид Эверестэд авирах зөвшөөрөл өгөх эсэх нь ч тодорхойгүй байгаа юм. Өнгөрсөн оны дөрөвдүгээр сард Гималайн оргилд цас нурж, томоохон осол гарахад 16 шерпа /уулчдын хөтөч/ амь насаа алдсан. Энэ явдлын дараа шерпа нар Эверестэд авирах гэсэн экспедицүүдийг бойкотлож, улмаар өдий хүртэл дэлхийн дээвэр рүү ямар ч уулчин гарч чадаагүй байгаа юм. Өнгөрсөн жил энэ оргил өөд гарахаар 31 багийн 300 гаруй уулчин зөвшөөрөл авчихаад байсан ч бойкотын улмаас аяллаа хийж чадаагүй. Тиймээс өнгөрсөн жил авсан зөвшөөрлөөрөө энэ жил авирахыг хүсч байгаа. Балбын Засгийн газар эдгээр уулчдын зөвшөөрлийг сунгаж өгнө гэж амласан ч одоо хүртэл тоймтой шийд гараагүй, уулчид бэлтгэлээ хийх эсэхээ ч мэдэхгүй хүлээж суугаа аж. Тэд Эверестэд гарахын тулд баг тус бүрээрээ 70 мянган ам.доллар төлсөн. Өнгөрсөн жил хүртэл Эверест руу авирах зөвшөөрөл долоон хүнтэй нэг багт 70 мянган ам.доллар, харин ганцаараа бол 25 мянган ам.доллар байжээ. Харин өнгөрсөн нэгдүгээр сараас эхлэн 25 мянга нь 11 мянган ам.доллар болж огцом буурсан байна.

Гэхдээ Балбын Засгийн газар хямдруулсан үнээр нэг ч уулчинд зөвшөөрөл олгож амжаагүй аж. Ирэх сарын эхээр мөсний докторууд гэгддэг Эверестийн хөтөч шерпа нар ууландаа гарч, уулчдын замыг засах юм байна. Тэд өнгөрсөн жилийнх шиг цас нурах аюулаас сэргийлж, зарим газар шинээр зам гаргасан бөгөөд тэднийг зам зассаны дараа олон улсын экпедицүүд Эверестийн үндсэн бааз дээр ирж, ирэх дөрөв, тавдугаар сард хийх авиралтандаа бэлдэж эхлэх ёстой аж.