Британийн кино ертөнцийнхөн өчигдөр хуран чуулж, өнгөрсөн оны шилдгүүдийг тодрууллаа. “БАФТА” хэмээн нэршиж заншсан Британийн шилдэг кино шалгаруулах ёслолын ялагч нь үндсэндээ Ричард Линклэтерийн “Хүүхэд нас” байлаа. Уэс Андерсоны “Будапештын зочид буудал” кино гэхэд таван номинацад ялсан ч “Хүүхэд нас” БАФТА-гийн гол шагнал болох шилдэг кино, шилдэг найруулагчийн номинац авсан юм. Тэгвэл бусад гол шагналыг “Бүхний онол”, “Алиса хэвээр” зэрэг бусад кино наадмыг ч өнгөлж буй кинонууд хуваан авлаа.

Тухайлбал, шилдэг эрэгтэй жүжигчнээр “Бүхний онол” киноны гол дүрд тоглосон Эдди Редмэйн тодорсон бол шилдэг эмэгтэй жүжигчин нь “Алиса хэвээр” киноны гол дүрийн жүжигчин Жулиан Мур байв.

Манай үеийн суут ухаантнуудын нэг Стефен Хоукингийн амьдралаас сэдэвлэн хийсэн киногоор шилдэг жүжигчний шагнал хүртсэн Эдди Редмэйн шагналаа нэрт эрдэмтэнд зориулж байгаагаа тайзнаас мэдэгдсэн юм. Стефен Хоукингийн залуу насны амьдралыг харуулсан кино гурван ч шагнал хүртсэнээс хамгийн нэр хүндтэй нь “Британийн  гайхамшигт кино” хэмээн өргөмжлөгдсөн юм.