Монгол Улсын Дотоодын нийт бүтээгдэхүүний хэмжээ 21,6 их наядаар хэмжигдэж байгаа бөгөөд өнөөдрийн байгаа өр нь үүний 58,3 хувь буюу ойролцоогоор 12,5 их наядаар хэмжигдэж буй юм.  Өрийн таазыг ДНБ-ний 60 хувьд хүргэнэ гэж тооцвол ойролцоогоор 360  тэрбум төгрөгөөр нэмэгдэх тооцоо гарч байгаа аж. Маргааш УИХ-ын нэгдсэн чуулганаар төсвийн тодотголын хэлэлцэнэ. Тиймээс УИХ дахь АН бүлгийн хуралдаанд УИХ-ын дарга, Ерөнхий сайд нар орж, төсвийн тодотголын талаар гишүүдтэй ярилцжээ. Ерөнхий сайдын хувьд Концессын хуулийг Аж үйлдвэрийн яам руу, Гудамж төслийг Улаанбаатар хотод шилжүүлэх тухай саналаа хэлж, МАН болон бусад намтай харилцан тохиролцсоны үндсэн дээр төсвийн тодотголыг цаашид  хэлэлцүүлэн батлуулах болоод өрийн таазтай холбоотой мэдээллээ өгчээ. Намууд гадаадаас өндөр хүүтэй богино хугацаатай зээл авахыг үндсэндээ зогсоохоор тохиролцсон. Харин Засгийн газраар өрийн таазыг ДНБ-ний 60 хувиар оруулж ирсэн. Өнөөдрийн хувьд Хөгжлийн банкнаас үнэ тогтворжуулах хөтөлбөрийн хүрээнд гаргасан хөрөнгө оруулалтыг төсөвт суулгахаар өрийн тааз ДНБ-ний 60 хувьд хүрчихээд байгаа гэнэ. Тэгэхээр цаашид өр нэмж тавих асуудал байхгүй хэмээн АН-ын бүлгийн дарга хэлэв. Тэрээр “Чингис, Самурай бондын мөнгө улсын төсөвт суухгүйгээр Хөгжлийн банкаар дамжин зарцуулагдаж, төсвөөс гадна байсныг МАН нэгтгэхийг шаардсаны дагуу Төсвийн тогтвортой байдлын хуулийн дагуу нэг төсөвт шилжүүлсний дараа Монгол Улсын өрийн хэмжээ ДНБ-ний 58,3 хувь болсон гэдэг нь тодорхой. Түүнээс биш Засаг байгуулагдсанаар өр нэмэгдээгүй юм гээд АН төсвийн нийт өрийг 40 хувьд барья гэсэн МАН-ын шаардлагыг хүлээж авахад бэлэн” гэлээ.