Жил бүрийн арванхоёрдугаар сарын 3-ны өдрийг дэлхий дахинаа хөгжлийн бэрхшээлтэй иргэдийн эрхийг хамгаалах өдөр болгон тэмдэглэдэг уламжлалтай. Өчигдөр эл тэмдэглэлт өдрийн хүрээнд хөгжлийн бэрхшээлтэй иргэдэд чиглэсэн олон арга хэмжээ өрнөсөн юм. Түүний нэг нь “Тэргэнцэртэй сайхан бүсгүй” шалгаруулах анхдугаар тэмцээн байлаа. Өнгөрсөн онд тэргэнцэртэй бүсгүйчүүд хувцас загварын шоу зохион байгуулж байсан бол энэ жил сайхан бүсгүй шалгаруулах тэмцээнээр хүрээгээ тэлсэн нь энэ. Тэмцээнд тэргэнцэртэй 15 сайхан бүсгүй оролцож, эхний хэсэгт ИЗОУИС-ийн оюутнуудын урласан загварын үзүүлбэрийг толилуулсан бол дараагийн хэсэгт өөр хоорондоо үзэсгэлэн гоогоороо өрсөлдлөө. Арга хэмжээний нээлтийн үеэр зохион байгуулагчид “хөгжлийн бэрхшээлтэй иргэд өнөөдөр эрхийнхээ төлөө тэмцэж, жагсаал цуглаан зохион байгуулаад ч юм уу, дуу хоолойгоо олон нийтэд хүргэж болно. Гэхдээ бид хөгжлийн бэрхшээлтэй иргэд ч гэсэн бусдын л адил хүн гэдгийг ойлгуулж. Урлаг гоо зүйгээр дамжуулан нийгэмдээ тоогдохыг зорьсон нь энэ” хэмээж байлаа. Үнэхээр “Тэргэнцэртэй сайхан бүсгүй” шалгаруулах тэмцээн нь хөгжлийн бэрхшээлтэй иргэд ч хөгжих хүсэл тэмүүлэлтэй гэдгийг батлан харуулсан арга хэмжээ болсон юм. Тэмцээнд Б.Оюунчимэг, Б.Цолмон, Б.Батчимэг, Б.Нарантуяа, Ч.Тунгалагтуяа, Б.Мөнххишиг, Ч.Ичинхорлоо, Д.Баяндэлгэр, н.Тунгалаг, Б.Бадамханд, А.Гантуаяа, Б.Гантуяа, Б.Хулан, Б. Ганцэцэг нарын сайхан бүсгүйчүүд оролцож оюун билэг, авъяас чадвар гоо үзэсгэлэнгээрээ өрсөлдсөн юм. Төгс сайхан бүсгүйгээр Б.Цолмон шалгарч Итали улс дахь хөгжлийн бэрхшээлтэй иргэдийн сувилалд 18 хоног амрах эрхийн бичгээр шагнууллаа. Харин “Оюунлаг мисс”-ээр Б.Батчимэг, “Төгс сайхан инээмсэглэлтэй мисс”-ээр Б.Нарантуая, “Авъяаслаг мисс”-ээр Ч.Тунгалагтуяа шалгарлаа. Тэмцээнд нэг нь түрүүлдэг жам ч хөгжлийн бэрхшээлтэй олон мянган иргэдийн өмнөөс дуу хоолой болон энэхүү тэмцээнд зориглон оролцсон бүсгүйчүүд бүгд ялагч байсан гэдгийг зохино байгуулагчид онцолж байлаа.