Мормоны сүм буюу Исус Христийн хожмын үеийн гэгээнтнүүдийн сүм гэхээр хүмүүс андахгүй. Мэдэхгүй хүн байвал хар хослол, цагаан цамцтай, үүргэвч үүрсэн хос залуус яваадаг гэвэл санах байх. Төв нь "Чингис" зочид буудлын хажууд байдаг шиг санаж байна.

Энэ сүмийг үүсгэн байгуулагч Жозеф Смитийг чухамхүү гэгээрсэн бурхан гэж тайлбарладаг нь ойлгомжтой. Гэтэл энэ сүсийн өөрийнх нь сайт дээр "ариун гэгээн" Жозеф Смитийг ойролцоогоор 30-40 эхнэртэй байсан тухай мэдээ оруулсныг "BBC" мэдээлж байна.
Эхнэрүүдийнх нь дотор 14 настай охин, нөхөрт гарсан хэд хэдэн эмэгтэй байсан юм гэнэ. Смитийг олон эхнэртэй байсан тухай яриа тус сүмийг үүсэн байгуулагдсан цагаас эхэлсэн ч сүмийн удирдлага ямагт үгүйсгэн ганц эхнэртэй, түүндээ үнэнч, ариун явдлын үлгэр жишээ болсон хүн гэж ухуулдаг, номолдог байсан.

Гэтэл Смит нь өөрөө олон эхнэртэй байсан төдийгүй өөрийг нь шүтэж дагаж ирсэн бусдад ч олон эхнэр авахыг зөвшөөрдөг байсан гэдгийг сүмийн одоогийн удирдлага одоо ийнхүү арга буюу хүлээн зөвшөөрч байгаа бололтой.

Гэхдээ мормоны сүмийнхэн 1890 онд олон эхнэр авахыг хориглосон бөгөөд хоригийг зөрчсөн хүнийг сүмээсээ хөөдөг болсон.

Америкийн Юта мужид үүссэн мормоны сүмийнхэн өөрсдийгөө албан ёсоор Исус Христийн хожмын үеийн гэгээнтнүүдийн сүм гэж нэрлэдэг. Эгнээндээ шинэ хүн элсүүлэх маш идэвхтэй үйл ажиллагаа явуулдаг тул өдгөө дэлхий дээр 15 сая хүн энэ шашныг дагадаг.

Өөрсдийг нь ганц эхнэртээ үнэнч байхыг номлодог байтал үүсгэн байгуулагч нь ийм "овоо эр" байсан тухай мэдээг өөр хаа нэгтээ бус харин сүмийн албан ёсны сайт дээр гаргаж олон нийтийн хүртээл болгосон нь мормон сүмийн олон хүнд жинхэнэ шок болсон нь ойлгомжтой.

Хариуд нь Мормонуудын удирдлага энэ мэт түүхэн бодит үйл явдлыг хүлээн зөвшөөрч байгаа нь өөрийг сүсэгтнүүдэд шударга хандаж байгаагийг илрэл гэж байгаа аж.

Мормонууд олон эхнэр авахыг хориглодог төдийгүй цай, кофе, тамхи, согтууруулах ундаа цээртэй, ижил хүйстэнтэйгээ бэлгийн харилцаан оронд хориотой. Сүсэгтэн болгон өөрийн орлогын 10 хувийг сүмдээ өргөл болгон өгч байх ёстой байдаг аж.