УИХ-ын гишүүн Ц.Даваасүрэн, Х.Болорчулуун нарыг Иргэний нисэхийн ерөнхий газарт халаа сэлгээ хийж, өөрсдийн хүмүүсээ оруулах тухай мэдээлэл гарах болсонтой холбогдуулан тайлбар хийлээ. Төсвийн байнгын хорооны үйл ажиллагааны дагуу  Үндэсний Аудитын газар, Мэргэжлийн хяналтын Санхүү, хяналт шалгалтын газар тус агентлагт хийсэн шалгалтаар илэрсэн зөрчлийн дагуу Улсын мөрдөн байцаах газар шалгаж эхэлсэн байна. ИНЕГ-ын дарга асан С.Батмөнх, ИНЕГ-ын Захиргаа хүний нөөцийн удирдлагын хэлтсийн дарга Т.Батжаргал нар 45 хүнийг Канад улсад сургахдаа 2011 онд 2.2 тэрбум ам.доллар, 2012 онд 2.7 тэрбум ам.доллар зарцуулж. Гэхдээ нэг хүний зардлыг 80 мянган ам.доллараар тооцож, Канадын Сенека коллежид 56 мянган ам.доллар төлж үлдсэнийг нь завшсан байж болзошгүй гэнэ. “Соба” гэх институтээр дамжуулан зуучлуулсан гэдэг ч захирал Батжаргал гэгч нь олдохгүй эрэн сурвалжлагдаж байгаа аж. Тэгэхээр энэхүү “Соба” институт нь мөнгө угаах зорилгоор байгуулсан байгууллага байж болзошгүй гэжээ. Сургалтын дээрх гэрээг байгуулсан С.Батмөнх, Т.Батжаргал нарыг Улсын мөрдөн байцаах газраас уг асуудлыг шалгаж, тэдэнд эрүүгийн хэрэг үүссэн гэж мэдэгдсэн гэдгийг Төсвийн байнгын хорооны дарга Ц.Даваасүрэн мэдээллээ. Гэтэл энэ асуудлаас болж Т.Батжаргал болон МАН-ын зарим гишүүнтэй нийлж Ц.Даваасүрэн, Х.Болорчулуун нарыг ИНЕГ-т халаа сэлгээ хийж, Дорнод, Хөвсгөл аймгийнхнаар дүүргэсэн тухай ярих болсныг няцаав. Х.Болорчулуун гишүүний охиныг ИНЕГ-т ажиллаж байгаа нь худлаа, “Дорнод гурил” компанидаа ажилладаг юм. Харин Хөвсгөлөөс ямар ч хүн даргаар томилуулаагүй гэлээ. Тиймээс тэд шүүхэд хандаж энэ хүнийг шалгуулахаа мэдэгдсэн юм.