2013 онд баталсан “Орон сууцны ипотекийн санхүүжилтийн журам”-д Монголбанкны Ерөнхийлөгч Н.Золжаргал энэ сарын 10-нд өөрчлөлт оруулжээ. Ингэснээр иргэд зөвхөн шинэ болон хуучин орон сууц гэлтгүй амины орон сууц авахдаа ипотекийн зээл буюу 20 хүртэлх жилийн хугацаатай жилийн 8 хувийн хүүтэй зээлд хамрагдах боломжтой болж байгаа юм. Зээл хүссэн иргэд 80 ам.метрээс дээшгүй талбайтай, нийтийн болон амины орон сууцыг зээлд хамруулж болох аж. Түүнчлэн амины орон сууц нь эрх бүхий байгууллагын шийдвэрээр ашиглалтад орсон, дэд бүтцэд холбогдсон байх шаардлагатай бөгөөд газрыг өмчлөх, эзэмших эрх улсын бүртгэлд бүртгэгдсэн, эзэмших эрх нь 20-иос дээш жилийн хугацаатай байх ёстой аж.