Таблетууд нь танилцуулах арга хэмжээ болохоос өмнө бета-туршилтын шатандаа байсан “iOS 8.1” үйлдлийн системээр ажилладаг байна. “Apple” компанийн дэд ерөнхийлөгчийн хэлснээр, уг үйлдлийн системийг даваа гарагт хэрэглээнд гаргах ажээ.
“iPad Air 2” нь өмнөх загвараасаа 18 хувиар нимгэн буюу 6,1 мм зузаантай болсон байна. Дэлгэц, корпусын хоорондох нарийн зааг байхгүй болж дэлгэц нь “iPhone” гар утасныхтай адил болсон нь зургийн чанарыг сайжруулах ажээ. Үүнээс гадна, шинэ таблетуудад хурууны хээгээр мэдрэгч “Touch ID” программыг суурилуулсан байна. Энэ мэдрэгчийг анх “iPhone 5S” гар утсанд суурилуулсан юм.
Таблетууд мөн урьд нь зөвхөн iPhone 5s, 6 болон 6 Plus загварын гар утаснуудад ашиглах боломжтой байсан “Burst Mode” программтай болсон байна. Товчлуур дарах үед нэг секундэд 10 зураг авах боломжтой болжээ. Шинэ таблетууд цагаан, саарал, алтан шар гэсэн гурван өнгөтэйгөөр худалдаанд гарна. 16 Гб-ын багтаамжтай “iPad Air 2” нь 499 доллар, 64 Гб-тай нь 599 доллар, 128 ГБ-ын багтаамжтай 699 долларын үнэтэй байх ажээ.
Таблетуудын урьдчилсан захиалгыг 10 дугаар сарын 17-ноос эхлэн авна. Хоёр загвар хоёул АНУ болон Европт ирэх долоо хоногт худалдаанд гарна.
Эдгээрээс гадна, “Apple” компани шинэчилсэн ширээний компьютер “iMac Retina K” загварыг танилцуулжээ. 27 инчийн дэлгэцтэй уг компьютерын үнэ багтаамжаасаа шалтгаалан 2499 доллароос эхлэх аж. Ширээний компьютерын шинэ дэлгэц нь 30 хувиар бага эрчим хүч хэрэглэдэг байна.
