Манай улсад одоогоор 60 сая гаруй малтай ч дотоодын хэрэгцээндээ 10 орчим сая мал хэрэглэж, 50 гаруй сая мал өвөлжих аж. Нийт сумын 60 хувьд нь ургац их, зуншлага сайн байсан ч үлдсэн 40 хувьд нь анхаарч өвөлжилтийн ибэлтгэлийг сайн хангах шаардлагатай гэнэ. 

Улсын хэмжээнд энэ намар нийт 1.25 сая тонн өвс хадлан бэлтгэхээс 968 мянган тонн өвс, 98 мянган тонн үйлдвэрийн болон гар тэжээл бэлтгэхээс 68 мянган тонныг бэлджээ. Хадлан бэлдэхэд 5000 дугуй трактор, 2500 морин хадуур, тармуур, 453 дунд болон том оврын трактор, хаман боогч болоод 180 мянга орчим хүн ажиллав.

Ховд аймгийн Дарви суманд 150 гаруй мянган га талбайг улсын тусгай хэрэгцээний бэлчээрт авсан. Аймаг дундын найман бүсийн 780 мянган га бэлчээрт 1.2 сая мал отроор өвөлжүүлж, хаваржуулах гэрээ хийсэн. Нийт 21 аймагт инженерийн хийцтэй 385 худаг шинээр барихад долоон тэрбум төгрөг зарцуулсан. Үлийн цагаан оготнотой тэмцэх ажил есөн аймгийн 490 мянган га газарт, царцаатай тэмцэх ажил дөрвөн аймгийн 112.5 мянган га газарт зохион байгуулсан гэж Ш.Түвдэндорж сайд тайлагнав. Орон нутагт өвөлжилтийн бэлтгэл хангах санхүүгийн эх үүсвэр бүрдүүлэхийн тулд малчдад ноосны урамшуулал олгожээ. Нийт 36 тэрбум төгрөгийн 10 хувийг улсын санд таталгүйгээр орон нутагт өгсөн аж. Малын тооноос хамааруулж сумдад 5-15 сая төгрөг оногджээ.

Эрчимжсэн мал аж ахуйг дэмжих, экспорт нэмэхээр сайн үүлдрийн үхэр, зөгий авчээ. Мянган үхэр төлөвлөснөөс Франц, Герман, Словак улсаас сементал, монтбелльярд, хар тарлан 850 үхэр оруулж иржээ. Гурван жилийн дараа бүлээр нь эргүүлж өгөхөөр тохирч ОХУ-аас 800 бүл зөгий импортолсон байна.