Дөрвөн жилд нэг удаа зохион байгуулагддаг Азийн спортын их наадам БНСУ-ын Инчён хотноо болж өндөрлөлөө. Азийн олимп гэдэг энэ наадамд шар тивийн 45 улс орны 13 мянган тамирчин спортын 36 төрөлд 439 багц медалийн төлөө өрсөлдөхөд  Монгол Улс  спортын 23 төрөлд 234 тамирчин хурд хүч, авхаалж самбаагаа сорьж  5 алт, 4 мөнгө, 12 хүрэл медал авч  45 улс орноос 16 дугаар байрт жагссан байна. 

Монголын баг тамирчид 1974 онд Ираны нийслэл Тегеран хотноо болсон Азийн спортын VII наадамд хагийн анх оролцож  хоёр алт, хоёр мөнгө, таван хүрэл медаль хүртэж байсан бол үүнээс хойш нийт 14 алтан медаль хүртсэний гурвыг нь  "Шинэ Дели-1982" наадмаас хүртэж байжээ. Харин энэ удаагийн "Инчён-2014"-т алтан медалиа тав болгон өсгөж, Азийн спортын наадмуудаас  нийт 19 алтан медаль хүртээд байна.
Манай тамирчдаас  Азийн наадмын аваргыг боксчин ОУХМ Д.Отгондалай, таеквондын тамирчдаас анхны медальтан болсон М.Түмэнбаяр,   жүдо бөхийн төрөлд эрэгтэйчүүдийн -100 кг-д Олимпийн алт, мөнгөн медальт, Монгол Улсын Хөдөлмөрийн баатар, Гавьяат тамирчин Н.Түвшинбаяр, 66 кг-д Дэлхийн залуучуудын аваргын хошой мөнгөн медальт Д.Төмөрхүлэг, эмэгтэйчүүдийн 48 кг-д Дэлхийн аварга, Гавьяат тамирчин М.Уранцэцэг нар алтан медаль хүртэж, Дэлхийн аварга, ОУХМ Г.Болдбаатар, Б.Дүүрэнбилэг, Г.Одбаяр нар  мөнгөн медаль,  Л.Отгонбаяр, Н.Дагвасүрэн, Д.Сумъяа, Ц.Наранжаргал нар хүрэл медаль хүртлээ. Мөн чөлөөт бөхийн баг тамирчдын хувьд эмэгтэйчүүдийн 55 кг-д ОУХМ С.Бямбацэрэн мөнгөн медаль, эрэгтэйчүүдийн 57 кг-д залуучуудын ДАШТ-ий мөнгөн медальт Б.Номин, эрэгтэйчүүдийн 97 кг-д Азийн аварга Д.Хүдэрбулга, эмэгтэйчүүдийн 63 кг-д насанд хүрэгчдийн болон залуучуудын Дэлхийн аварга С.Цэрэнчимэд, 75 кг-д дэлхийн аваргын мөнгө, хошой хүрэл медальт, Монгол Улсын Гавьяат тамирчин О.Бурмаа нар хүрэл медаль хүртсэн юм.
Мөн Азийн наадмын буудлагын тэмцээнд урт бууны тамирчин Ч.Нарантуяа 50 метрт хэвтээ байдлаас 60 сум буудах дасгалд 624.1 оноогоор алтан медаль хүртэж, Азийн наадмын аварга болов. 25 метрийн спорт гар бууны дасгалд онч сорьсон олимпийн мөнгөн медальт, Хөдөлмөрийн баатар, Гавьяат тамирчин О.Гүндэгмаа хүрэл медалийн эзэн болсон юм.  
Медалийн чансаагаараа БНХАУ 151 алт, 108 мөнгө, 83 хүрэл, нийт 342 медаль хүртсэн амжилтаар тэргүүлсэн бол БНСУ /79+71+84/, Япон /47+76+77/, Казахстан /28+23+33/, Иран /21+18+18/ улсууд удаалжээ. Харин 2018 оны Азийн XVIII наадмыг Жакарта хотноо зохион байгуулах  эрх аваад байгаа Индонези улсын баг тамирчид 4 алт, 5 мөнгө, 20 хүрэл медальтайгаар наадмыг өндөрлүүллээ.