Одоогоор 19 сайдтай, 16 яамтай ажиллаж буй Шинэчлэлийн Засгийн газрын бүтцийг цомхотгон өөрчлөх асуудлыг УИХ-ын чуулганы ээлжит хуралдаанаар авч хэлэлцлээ. Төрийн байгуулалтын байнгын хороогоор хэлэлцэж дуусмагц УИХ-ын чуулганы хуралдаанд шилжүүлж, анхны хэлэлцүүлэгт оруулахаар болсон юм. Өнгөрсөн баасан гарагт өрнөсөн энэ үйл явдлуудын маргааш буюу мягмар гарагт Төрийн байгуулалтын байнгын хороо болон нэгдсэн чуулганы хуралдаанаар үргэлжлүүлэн хэлэлцэнэ. Товчхондоо, Засгийн газрын шинэ бүтцийг мягмар гарагт багтаан батлахаар шуурхайлж буй юм.

Ерөнхий сайд Н.Алтанхуяг, “Шинэчлэлийн Засгийн газрыг анх 16 яамтай байхаар зохион байгуулснаар эдийн засаг, уул уурхай, барилга, хот байгуулалт, зам тээвэр зэрэг олон салбарын бодлого тодорхой болж, салбарын хөрөнгө оруулалт нэмэгдэж, Засгийн газрын үйл ажиллагааны хөтөлбөрийг хэрэгжүүлэхэд ахиц гарсан” хэмээн хуучин бүтцийн ажлаа үнэлсэн. Үргэлжлүүлээд “Гэхдээ Монгол Улсын эдийн засгийн хөгжлийг эрчимжүүлэх, Засгийн газрын үйл ажиллагааны хөтөлбөрийг хэрэгжүүлэх ажил зохион байгуулах, эдийн засаг, нийгмийн хөгжлийг хангах зорилгоор Засгийн газрын яамдын бүтцийг оновчтой тогтоож, чиг үүргийн давхардалгүй ажиллах үүднээс зарим яамыг нэгтгэж өөрчлөн зохион байгуулахаар эдгээр хууль тогтоомжийн төсөл санаачлан өргөн барьсан” хэмээн хэллээ.
Юутай ч, ажил үүргийн давхардал бий болоод байсныг Ерөнхий сайд хүлээн зөвшөөрөөд энэ нь Засгийн газрын мөрийн хөтөлбөр хэрэгжүүлэхээс өгсүүлээд эдийн засгийн хөгжилд чөдөр болсныг хэлсэн юм.