Ташкент хотноо пүрэв гарагт эмэгтэй чөлөөт бөхийн насанд хүрэгчдийн ДАШТ-ий 53, 58, 75 кг-ын жингийн барилдаанууд болж манай гурван бөх дэвжээнд гарч барилдсанаас 75 кг-д гавьяат тамирчин О.Бурмаа хүрэл медалийн эзэн боллоо.

ДАШТ-ээс гурван медальтай манай алдарт бөхчүүд З.Ойдов, Х.Баянмөнх, О.Насанбурмаа нартай эн зэрэгцэж дэлхийн дэвжээнээс нэг мөнгө, хос хүрэл медальтай болж шилдэг бөх гэдгээ нотоллоо. 75 кг-д О.Бурмаа Болгарын бөхтэй барилдахдаа 1:3 оноогоор ялагдаж яваад барилдаан дуусахад 8 секунд дутуу байхад 4 онооны мэх хийж гайхалтай ялалт байгуулсан. Харин Бразилийн бөхтэй барилдахдаа 1:0 оноогоор хожиж яваад тактикийн алдаа гаргаж мөнгөн медалийн оосроос атгаад алдаж орхисон нь тун харамсалтай.

55 кг-д Э.Сумьяа Америкийн бөхтэй барилдахдаа 4:2 оноогоор ялж яваад сүүлийн минутанд ардаа гаргаж тун хариуцлагагүй барилдаан хийж оноо алдаж хожигдлоо. Ийнхүү өнгөрсөн жил мөнгөн медаль хүртэхдээ Америкийн бөх Виктория Антонийг цэвэр ялсан бол энэ удаа нутгийн бөхийг барсангүй.

58 кг-д барилдсан Т.Мөнхтуяа хоёр удаа ялагдахдаа өрсөлдөгчдөө дандаа хөлөө алдан ардаа гаргаж, улмаар нэг мэхэнд дараалан оноо алдаж байв. Тэрбээр энэ алдаандаа дүгнэлт хийх бизээ.

Японы домогт бөх олимпийн 3 удаагийн аварга Саори Йошида энэ өдөр 11 дэх, харин 3 олимпийн  аварга Каоро Ичо 8 дахь удаагаа дэлхийн аварга цолыг хүртэж хосгүй амжилтын эзэд  болов.