Засгийн газрын хэрэгжүүлж буй нэгэн чухал ажил нь аймгийн төвүүдийг авто замаар холбох. Уг ажлыг хариуцан гүйцэтгэж буй Зам, тээврийн сайд А.Гансүх холбогдох албаныхантай хамт Булган, Хөвсгөлийн замын ажил хэрхэн үргэлжилж буйг газар дээр нь шалгажээ. Энэ жилийн хувьд Сүхбаатар, Өмнөговь, Хөвсгөл аймгийн төв хатуу хучилттай замаар нийслэлтэй холбогдох төлөвлөгөөтэй. Хөвсгөл-Булганы чиглэлийн 259 км авто замын ажлыг, зам барилгын дөрвөн компани хэсэгчлэн хувааж гүйцэтгэж буй.
Гэрээний хугацаанд ажлаа амжуулахын тулд цаг наргүй ажиллаж байгаагаа төслийн зохицуулагч С.Баясгалан хэлж байв. “Сарын өмнө ирэхэд ажлын гүйцэтгэл 70 гаруй хувьтай байсан. Гэтэл одоо ирэх сарын 1 гэхэд Хөвсгөл-Булганы авто замын ажил бараг дуусчихна гэсэн итгэл төрлөө. Энэ ондоо багтааж дуусгахын тулд ойр ойр хянаж ажиллалаа” хэмээн сайд А.Гансүх онцолсон юм. Тариалан сумын 32 км зам барилгын ажлыг гүйцэтгэгч “Хотгор зам” компани өмнө нь цаг агаараас шалтгаалж ажил нь нэлээд удааширсан байжээ. Харин энэ удаа зургаахан км замын асфальтан хучилт хийгээд дуусчихна хэмээн угтсан аж. Мөрөн-Тариалан чиглэлийн 25 км авто замын ажил хийхээр гэрээ байгуулсан “Их Монгол барилга” компани суурийн ажлыг дууссан, одоогоор 16 км замын асфальтан хучилтын ажил үлдсэн, гэрээт хугацаандаа амжиж дуусгана гэжээ.