Өнөөдөр чөлөөт бөхийн насанд хүрэгчдийн 2014 оны эрэгтэй 44 дэх, эмэгтэй 25 дахь удагийн Дэлхийн аварга шалгаруулах тэмцээн /ДАШТ/ Узбек улсын нийслэл Ташкент хотын “Гимнастикийн ордон”-д эхэллээ.

Дэлхийн 100 орчим орны шилдэг 800 гаруй бөх ур чадвар, бяр тэнхээгээ сорин ДАШТ-ий алт, мөнгө, хүрэл медалийн төлөө өрсөлдөнө. Тухайлбал , энэ тэмцээнд ОХУ, Болгар, Гүрж,  Иран, АНУ, Монгол, Турк, Англи, Япон, Франц, Грек, Азербайжан, Украин, Узбек, Армян, Казахстан, Беларусь, Канад, Польш, БНАСАУ, Унгар, ХБНГУ, Чех, БНСУ, Словак зэрэг чөлөөт бөхийн спортоор дэлхий, олимпийн дэвжээнд тэргүүлэгч орнуудын шилдгүүд ирсэн байна. Өнөөдөр эрэгтэй чөлөөт бөхийн 57, 70, 86, 125 кг жингийн барилдаанууд болж шилдгүүдээ тодруулна.

Өнгөрсөн жил Унгар улсын нийслэл Будапешт хотод болсон ДАШТ-нд Гавьяат тамирчин Г.Мандахнаран 65 кг-д хүрэл медаль хүртэж эрэгтэй баг 19 оноогоор наймдугаар байр эзэлж Дэлхийн цомын төлөө эрэгтэй багуудын тэмцээнд оролцох эрх авсан амжилтаа энэ жил ахиулна гэдэгт манай бөх сонирхогчид итгэж байна.

Өнөөдөр манай дөрвөн бөх дэвжээнд гарч барилдах бөгөөд Э.Бэхбаяр, Б.Анхбаяр, О.Үйтүмэн нар ДАШТ-нд хоёр дахь удаагаа, Ж.Чулуунбат 5 дахь удаагаа, О.Үйтүмэн, Ж.Чулуунбат хоёр олимпийн наадамд барилдаж байсан бүгд л туршлагатай бөхчүүд юм. Чөлөөт бөх нь Монгол Улсын тэргүүлэгч спорт төрөлд зүй ёсоор ордог.