Жүжигчин Жорж Клуни удахгүй хуримаа хийх зар хэдэн сарын өмнөөс л тарсан. Гэхдээ тэр олны төсөөлж байсан шиг хуримаа Швейцарь дахь Комо нуурын эрэг дээр биш, харин Италийн Венец хотод хийхээр шийджээ. Учир нь, ирээдүйн сүйт бүсгүйтэйгээ тэрээр Италид л анх учирсан болохоор энд хуримын ёслолоо хийнэ гэж өчигдөр Венецэд болсон нэгэн хүлээн авалтын үеэр мэдэгджээ.
"Наслахдаа ч хамгийн сайхнаараа байгаа эр" хэмээх жагсаалтын нэгдүгээрт саяхан бичигдсэн 53 настай настай жүжигчин хоёр жилийн өмнө танилцсан хуульч бүсгүй Амал Аламудинтэй сүй тавиад хэдэн сарын нүүр үзэж байна. 
Удам судар сайтай, дээр нь өндөр боловсрол мэдлэгтэй, ирээдүйтэй 30 гаруйхан настай залуу бүсгүй Амал цаашид улс төр, нийгмийн карьер ч хөөж магадгүй байгаа Жорж Клунигийн хувьд хамгийн сайн сонголт, тиймдээ ч өмнөх олон найз бүсгүйчүүдээс ялгаатай нь ганцхан түүнд л гэрлэх санал тавьсан юм хэмээн хэвлэлүүд бичиж буй.
Энэ сарын сүүлчээр болох хуримдаа Амал Аламудин Их Британийн гүнгийн авхай Кейт Миддлтоны хуримын даашинзыг хийсэн "Alexander McQueen"-ий загварын ордныг сонгосон гэнэ. 
