Хэдхэн долоо хоногийн өмнө Австралийн иргэн 70 настай Сирил Бэлдок Англи ба Францыг заагладаг Ла Маншын хоолойг сэлж гаталсан хамгийн өндөр настан болж нэлээд дуулиан тарьж байв. Гэтэл түүний дээд амжилт удаан тэссэнгүй. Өмнөд Африкийн иргэн 73 настай Отто Тэнинг энэ хоолойг амжилттай гатлан шинэ дээд амжилтын эзэн боллоо. Тэнинг нь Бэлдокийн адилаар Ла Маншийн хоолойг өмнө ч бас гаталж байжээ. 1994 онд анх гаталснаас хойш 20 жилийн дараа дахин гатлах болсон шалтгааныг тайлбарлахдаа өөртөө анхаарал тавьдаг, шаргуу ажилладаг түүний насны хүн юу хийх чадвартай байдгийг дэлхий дахинд харуулахыг хүссэн гэсэн байна.
Ла Маншийн хоолой хамгийн нарийн газраа 34 км-ийн өргөнтэй байдаг ч сэлж гатлаж байгаа хүмүүс усан доорхи урсгал зэрэг шалтгааны улмаас 40 км-ээс багагүй газар сэлэх шаардлагатай болдог.