Уул уурхайн яамнаас Монгол Улсын төрөөс эрдэс баялгийн салбарт баримтлах бодлогын баримт бичиг, Ашигт малтмалын тухай хуульд нэмэлт өөрчлөлт оруулах тухай хуулийн төслийг боловсруулж 2014 онд УИХ-аар батлуулсан. Эдгээр хууль, эрх зүйн баримт бичигт ашигт малтмалын орд, түүний нөөцийн судалгаа, үндэсний болон олон улсад хүлээн зөвшөөрөгдсөн салбарын мэргэжлийн төрийн бус байгууллага, мэргэшсэн мэргэжилтний чиглэлээр тодорхой заалт тусгасан.
Дээрх болон холбогдох хууль, тогтоомжийг хэрэгжүүлэхээр Уул уурхайн яам, Геологи, уул уурхайн салбарын мэргэжлийн холбоодын төлөөлөл бүхий Монголын геологи, уул уурхайн мэргэжлийн институттэй хамтран ажиллах юм. Хоёр тал олон улсын хэмжээнд хүлээн зөвшөөрөгдсөн түвшинд мэргэшсэн мэргэжилтэн сургах, эрх олгох асуудлыг хэрэгжүүлэх аж. Мөн Ашигт малтмалын нөөцийг тайлагнах олон улсын стандартын хорооны загварт суурилсан хайгуулын ажлын үр дүн, ашигт малтмалын баялаг, ордын нөөцийг нээлттэйгээр тайлагнах Монгол Улсын заавар (MRC-Code) гарган, цаашид боловсронгуй болгон ажиллах Ашигт малтмалын баялаг, ордын нөөц тайлагнах Үндэсний хороог (MRC) байгуулан ажиллахад чиглэж буй аж.
