"Милл кино компани" болон "Монголфильм групп", "Улаанбаатар фильм"-ийн хамтын бүтээл "Ээжээ надтай гэрлээч" уран сайхны кино өчидөр 18:00 цагаас III, IV хорооллын "Өргөө", "Тэнгис" кино театруудад нээлтээ хийлээ.
Нэрнээсээ эхлээд хүмүүсийн анхаарлыг татаж чадсан тус кино хүний сэтгэлийг хөдөлгөхийн зэрэгцээ гэр бүл, нөхөрлөлийн үнэ цэнийг мэдрүүлсэн сайхан бүтээл болсныг онцолмоор байна. Хэний ч санаанд оромгүй үйл явдлаар дүүрэн өрнөх киноны төгсгөл хэсэгт "Чоно хүртэл гичийгээ махаар сольдоггүй юм шүү" гэж хэлсэн хатуухан үг үзэгчдэд нэгийг бодогдуулж хоёрыг тунгаахад хүргэж байлаа.
Тус киноны найруулагчаар "Милл кино компани"-ийн захирал, кино найруулагч Л.Лхагважаргал ажилласан бол продюсерээр "Мөрөөдлийн театр"-ын жүжигчин СТА Д.Баттөмөр, зохиолчоор Д.Мөнхбат, хөгжмийн зохиолчоор "Sweetymotion" хамтлагийн продюссер, хөгжмийн зохиолч СТА Б.Чинбат нар ажилласан байна. Гол дүрүүдэд Ч.Ундрал, Б.Анхбаяр, Г.Ган-Очир, Д.Баттөмөр, Б.Хулан нар тогложээ.
Нээлтийн үеэр жүжигчин Б.Хуланд Соёл, Спорт, Аялал Жуулчлалын яамнаас түүний урлагт хүчин зүтгэж буйг нь өндрөөр үнэлэн МУСТА цол тэмдгээр шагнасан юм. Дэлхийн стандартны дэвшилтэд техник технологийн тоног төхөөрөмжийг ашиглан бүтээсэн тус кинонд үзэгч та тухлан саатаарай.
