Наадмын өмнөх өдөр үзэгчид тун завгүй байх нь. Энэ өдөр “Хурд” хамтлаг 20 жилийнхээ ойн тоглолт хийхээр зар дуулгасантай зэрэгцэн “Харанга” хамтлагийн дуучин Х.Лхагвасүрэн гавьяат болсноос хойшхи анхны тоглолтын урилгаа ч үзэгч түмэнд түгээлээ.
“Хурд”-ын өнгөрсөн 20 жилийн хугацаанд гаргасан хит уран бүтээлүүдээс түүвэрлэн толилуулах “Best Hits of Hurd Show Concert” ирэх сарын 10-нд “Мишээл Экспо”-д шоу маягаар болох бол наадмын уур амьсгалыг мэдрүүлэх Х.Лхагвасүрэнгийн “Морин хуур, толин хул” тоглолт “UB Palace”-т болох аж. Дуучин Х.Лхагвасүрэн өнгөрсөн жилийн наадмаар мөн бие даасан тоглолтоо хийж байсан бол энэ удаа хамтлагийнхаа ойд зориулж буйгаараа онцлог юм. “Харанга” хамтлагийн гишүүд 25 жилийн ойдоо зориулан цуврал тоглолт хийж байгаагийн нэг нь “Морин хуур, толин хул” юм. 
