АНУ-ын хөлбөмбөгийн эмэгтэйчүүдийн шигшээ багийн хаалгач Хоуп Солог ахуйн хүчирхийллийн хэрэгт сэжиглэн баривчилсан байна. Түүнийг өөрийн эгч, хамаатныхаа бүсгүйг зодож хүч хэрэглэсэн гэж буруутгажээ. Өнгөрсөн 20-ны баасан гарагт энэ явдал Вашингтон мужийн Киркланд дахь гэрт нь болох үеэр Хоупын нөхөр америкийн хөлбөмбөгийн “Сэттл Сихоукс” багийн тоглогч Жеррами Стивенс бас байжээ. Хүчирхийлэлд өртсөн хүмүүсийн нэрийг хууль хяналтынхан болон хэвлэлийнхэн зарлаагүй байна.
“Гэрт нь том үдэшлэг болж байгаад нөхцөл байдал хяналтаас гарч маргаан үүссэн” гэж орон нутгийн The Seattle Times хэвлэл цагдаагийн дэслэгч Майк Мюррейгийн үгийг иш татсан байна. 32 настай тамирчин бүсгүй энэ сарын 26-ны өдөр Коннектикут мужийн Хартфорд хотноо Францын шигшээ багтай хийх нөхөрсөг тэмцээнд оролцох ёстой байсан юм.
Тамирчин бүсгүй ийм явдал болоогүй хэмээн няцааж байгаа гэнэ. Тэрээр даваа гарагт шүүхийн өмнө энэ бүхнээ тайлагнана.