Ираны эсрэг тоглолт 0-0-ын харьцаатай бараг л дуусах гэж байхад Мессигийн хийсэн гоол аргентинчуудыг аварлаа. Тийм ч учраас аргентинчууд агуу Месситэй байхад алзахгүй хэмээн түүнээр бахархаж байна. “Бидэнд Месси гэж суут хүн байдаг юм. Азараа тэр Аргентин юм” хэмээн тус багийн дасгалжуулагч Алехандро Сабелла үгээ олохгүй магтаж байна. “Иран үнэхээр чанга хамгаалсан ч Месситэй байхад боломжгүй зүйл гэж үгүй. Хоёр хаалгач байсан ч түүний бөмбөгийг хааж чадахгүй байсан” хэмээн Сабелла нэмж хэлжээ.
Иран-Аргентины тоглолтын 91 дэх минутад  зүүн хөлөөрөө гайхамшигтай мэргэн цохиж оруулсан энэ гоол бол Мессигийн эх орныхоо нэрийн өмнөөс хийсэн 40 дэх гоол юм. Тэрээр ДАШТ-ий өнгөрсөн хоёр тоглолтынхоо талаар “Хэрэв дүгнээд үзвэл бид илүү дээр тоглох боломж байсан. Бид төсөөлж байсан шигээ тоглож чадахгүй байна. Гэхдээ цаг дуусахын алдад гоол хийсэндээ би үнэхээр баяртай байна.  Хүн бүр баярлан, бие биеэ тэврэн авч байхыг харах сайхан байсан. Гайхалтай агшин байлаа” хэмээн сэтгүүлчдэд ярьжээ.