Манай гаригийн хамгийн хүнд хүний нэг мексик эр Мануэль Урибе 48 насандаа нас барсан байна. Тэрээр 2007 онд дэлхийн хамгийн хүнд эрээр тодорч байсан юм.
Тэрээр тавдугаар сарын 2-нд зүрхний дутагдалд орсны улмаас Монтеррей хотын эмнэлэгт өргөх кранаар хүргүүлэн хэвтэж байгаад нас барсан байна. Эмч нар нас барсан шалтгааныг  яг оношилж нэрлээгүй ч тэрээр зүрх, элэгний өвчнөөр нас барсан нь тодорхой байна. Одоо түүний эхнэр Клаудия үлджээ.
Урибегийн жин  2001 онд 597 кг хүрч орноосоо босч чадахаа больсон юм. 2007 он гэхэд түүний жин 560 кг болсон байжээ.

Хоолны дэглэм, эмч нарын тусламжтайгаар тэрээр жилийн дотор 360 кг хүртэл турж байсан ч яг нас барахдаа 394 кг жинтэй байсан юм.
Өнөөдөр манай дэлхий дээр Саудын Арабын Халид бин Мохсен Шаари гэгч 610 кг жинтэйгээрээ хамгийн хүнд жинтэй эрд тооцогдож байгаа юм байна.