“Петро Чайна дачин тамсаг” компанийн орлогоос мөнгө угаасан хэргээр хорих 461 дүгээр ангид хоригдож байсан Газрын тосны газрын дарга асан Д.Амарсайхан өнөөдөр нас барсан байна. Өнөөдөр тэрээр хорих ангийнхаа уулзалтын өрөөнд 16 цаг 30 минутын орчим өмгөөлөгчтэйгөө уулзаж байгаад гэнэт татаж унан эмнэлгийн тусламж үзүүлсэн ч нэмэр болоогүй гэнэ.

Түүний холбогдох хэргийг сөхвөл, “Петро Чайна Дачин тамсаг” компани Монгол Улсын Засгийн газартай газрын тосны бүтээгдэхүүн хуваах гэрээ байгуулан 2007 оноос өнөөг хүртлэх явж байгаа. Гэтэл энэ хугацааны орлогоос тодорхой хэмжээний мөнгийг Хонконгийн тодорхой банкны тодорхой данс руу нууцаар шилжүүлж байна гэсэн мэдээллийг Мөрдөн байцаах газар авснаар шалгаж эхэлсэн байдаг. Тиймээс хоёр талын санхүүгийн байгууллагын аудитын дүгнэлтээр 417 мянган баррель буюу 40.5 сая ам.долларын дутагдал гарснаар энэ хэрэг үүдэлтэй.
Хятадын тал үүргээ ямар ч асуудалгүй биелүүлж байгаа бөгөөд шалгалтаар ямар ч зөрчил илрээгүй байдаг. Харин манай талаас энэ компанийг хариуцсан хүмүүс нууц аргаар зувчуулж байсан юм.