Монголын телевизийн зах зээл,  нэгэн шинэ бүл нэмэн “Хоёрдугаар суваг” телевиз өнөөдөр нэвтрүүлгээ цацаж эхэлж байна. Телевизийн техникийн хамгийн сүүлийн үеийн HD техникээр зэвсэглэж, мэргэжлийн залуу уран бүтээлчдээр багаа бүрдүүлсэн энэ хамт олон үзэгч олны гэрт орой бүр морилдог өнөөгийн телевизүүдийн дунд өөрийн гэсэн орон зай эзэлж, өвөрмөц сонин нэвтрүүлэг, мэдээ мэдээлэл цацахаар “Өөрөөр сэтгэе” уриатайгаар  монголын телевизийн эфирт орж ирлээ.

Өдөр тутмын сонины чамбай нийтлэлүүдээрээ уншигчдын хэзээний танил болсон сэтгүүлч Л.Мөнхбаясгалангийн эрхлэх энэ телевиз та бидний өмнө нь амтархан үзэж байсан “Цензургүй яриа” улс төр мэдээллийн нэвтрүүлэг, зөвлөлт монголын хэдхэн киногоор хязгаарлагдаж байсан киноны зах зээлийг 1990-ээд оны эхээр зад татан орж ирсан венесуэлийн олон ангит “Халтар царайт” цуврал киногоор үзэгчдийнхээ мэлмийг мялаан нэвтрүүлгээ эхэлж байна.

Өдрөөс өдөрт хүрээгээ тэлж, уншигч, үзэгчдийнхээ хараа, сонор мэлмийг мялааж байгаа хэвлэл мэдээллийн зах зээлд шинээр хөл тавьж байгаа “Хоёрдугаар суваг” телевизийн хамт олонд өдөр өдрийн өглөөний ургах нарнаас үдшийн бүрий, шөнө дөл хүртэл үзэгчиддээ хүргэх шинэ шинэ уран бүтээл нь арвин, бас үзүүштэй байж мянга мянган үзэгчдээ байлдан дагуулахын ерөөл дэвшүүлье.