Их Британийн хамгийн баян таван гэр бүлийн нийт хөрөнгийн хэмжээ энэ улсын хүн амынх 20 хувийг эзэлдэг ядуусын хөрөнгөнөөс илүү байгаа тухай “Oxfam” хүмүүнлэгийн байгууллага мэдээллээ.
Энэ байгууллагын тооцоолсноор уг таван гэр бүлийн нийт хөрөнгийн хэмжээ 47 тэрбум ам.доллар гэдэг нь хамгийн ядуу 12,6 сая британичуудын нийт хөрөнгөнөөс хол илүү байгаа аж.
Сүүлийн жилүүдэд Британид баян ба ядуугийн зөрүү улам бүр нэмэгдсээр нийгмийн давхаргууд нь хоорондоо эрс ялгаатай болон хувирч байгааг “Oxfam” анхаарууллаа. Тэд Засгийн газарт хандан ирэх жилүүдийн төсвийг хэлэлцэхдээ татвараас зайлсхийх боломжийг цөөлөхөд бус харин хэт тансаглалд ногдуулдаг татварыг нэмэгдүүлэхэд анхаарахыг уриалав.
Үгүй бол цаашид жил ирэх тутам баячууд, элитүүд улам баяжиж, хоногийн хоолоо арай хийн залгуулдаг ядуусын эгнээ өргөсөнө гэлээ.
Баян ба ядуу хоорондын ялгаа нь тухайн нийгэмд баялаг хэрхэн хуваарилагдаж байгааг харуулдаг чухал үзүүлэлт. Ялгаа их байх тусам тухайн улсад нийгмийн бухимдал нэмэгдэж, олныг хамарсан үймээн, иргэний дайн гэх мэт таагүй үзэгдэл үүсэх эрсдэл өндөр болдог.
Их Британи гэх мэт баян, хүчирхэг улсуудад баян ба ядуугийн ялгаа олон жилийн турш бага байсаар ирсэн ч сүүлийн үед дэлхийн эдийн засаг ба санхүүгийн хямралаас үүдэлтэй ажилгүйдэл гэх мэт зүйлсээс болж эрс ихэсч байгаа бололтой.
