“Туркойз Хилл Ресурс” компани “Оюу Толгой” компанийн үйлдвэрлэлийн үйл явц, төслийн санхүүжилт болон Монгол Улсын Засгийн Газартай хийж буй хэлэлцээрийн үйл явцын талаар өчигдөр мэдэгдэл гаргажээ. Үүнд, дурдсанаар
“Оюу Толгой” ХХК  өнгөрсөн онд 26.400 тонн зэсийн баяжмал  борлуулж 55 сая ам.долларын орлого олсон байна. Өөрөөр хэлбэл,   77 мянган тонн баяжмал дахь зэс болон 157 мянган унц баяжмал дахь алт үйлдвэрлэв.  Гэвч борлуулалтын тоо хэмжээ нь төлөвлөсөндөө хүрээгүй байна. Иймд  өнгөрсөн онд борлуулах ёстой баяжмалын үлдсэн хэсэг нь энэ оны хоёр, гуравдугаар улирал хүртэл хойшлогджээ. Одоогоор энэ онд үйлдвэрлэх зэсийн баяжмалын 60 хувийг борлуулах гэрээ байгуулаад байна.  Үлдсэнийг нь  борлуулах гэрээгээ шинээр байгуулах ажил  үргэлжилж байгаа аж.   Баяжуулах үйлдвэрийг ашиглалтад оруулснаас хойш гарсан зарим нэг саатал гарсан. Тухайлбал хаягдал өтгөрүүлэх хэсгийн самнуурын шүднүүд эвдэрсэн явдал нь  үйлдвэрлэлийн хэмжээ буурахад нөлөөлөв. Тиймээс үйлдвэрлэлийн нэг шугамыг зургаагаас найман долоон хоногоор түр зогсоож болзошгүй байна.  Энэ онд “Оюу Толгой” 150 – 175 мянган тонн баяжмал дахь зэс, 700 -750 мянган унци баяжмал дахь алт үйлдвэрлэх төлөвлөгөө бий.   
Оюу Толгойн далд уурхайн бүтээн байгуулалтын санхүүжилтээ хойшлуулж ажлыг зогсоох болсоноо “Туркойз Хилл” компани  өнгөрсөн  оны  долдугаар сарын 28-нд мэдэгдсэн. Түүнээс хойш, хувь нийлүүлэгчдийн хооронд үүссэн асуудлуудыг шийдвэрлэх, төслийн санхүүжилтийг  сэргээх  зорилгоор Монгол Улсын Засгийн Газартай яриа хэлэлцээр хийж буй билээ.  Ингээд тус компани тодорхой нөхцлийг хангасан тохиолдолд, далд уурхайн бүтээн байгуулалтаа  дахин эхлүүлэх санал  тавьсан.  Төслийн санхүүжилтийн хүрээнд, санхүүжилтээр хангана гэсэн зээлдэгчдийн амлалтын хугацаа  дуусахаас өмнө, хувь нийлүүлэгчдийн хооронд хараахан шийдвэрлэгдээгүй үлдсэн асуудлууд, түүний дотор төслийн санхүүжилтийг шийдэхгүй бол далд уурхайн бүтээн байгуулалтын ажил дахин хойшлогдож болзошгүй байна.
“Туркойз Хилл” компанийн мэдэгдэлд  “Хувь нийлүүлэгчдийн хоорондын асуудлуудыг шийдвэрлэж, санхүүжилтийн цогц төлөвлөгөө, түүний дотор төслийн санхүүжилтийн талаар тохиролцоонд хүрч,  ТЭЗҮ-г бүх хувь нийлүүлэгчид болон Монголын Эрдэс баялгийн зөвлөлөөр батлуулж, бүтээн байгуулалтад шаардагдах бүх зөвшөөрл авсан тохиолдолд, далд уурхайн барилга бүтээн байгуулалтын ажил  үргэлжлүүлж, Оюу Толгой төслийг цаашид хөгжүүлэх эрмэлзэл дүүрэн байна” гэжээ.